نجوم الفن يدعمون رامي جمال بعد تعرضه للتنمر بسبب مرض البهاق

+ = -

تعرض الفنان رامي جمال للتنمر من متابعة عبر حسابه على “إنستجرام”، بعدما طالبته بالتوقف عن الغناء، والتفرغ لعلاج نفسه من مرض البهاق، وهو ما دفع عدد كبير من النجوم للتصدي للدفاع عنه.

وقال «جمال» عبر «إنستجرام»: «بما إني كده كده محظور، قررت أبدأ في اختيار أغاني جديدة لألبومي القادم بما أني بأخد سنة أو أكثر في التحضير ثانيًا بقى وده المهم قررت أعمل ألبوم لناريمان فيه أنواع مختلفة من الأغاني».

وأضاف: «الجميل أنها ماتعرفش أني قررت أعمل كده والأجمل أنها هتعرف من هنا، ويارب نفرح كلنا بفرج ربنا».

وتلقى رامي تعليقًا من إحدى المتابعات تسبب في إزعاجه، قالت فيه: «روح أتعالج يا رامي من البهاق ألبوم إيه أنت مش بتحقق لا مشاهدات ولا إيرادات وفر فلوسك في العلاج»، ليرد عليها: «النوع دا من البشر منتشر أوي، شوفت عند صديق ليا لاعب كرة قدم ما شابه العينة دي، عاوز أقولكم أنتم ولسانكم أصعب ڤيروس، ماحدش هيعيش للأبد ولينا رب نختصم بعض عنده، يارب تكونوا مبسوطين».

وإنهالت التعليقات على تصرّف المُتابعة، للتخفيف من قسوة الكلمات، فقالت ناريمان زوجة «جمال»: «منك لله بوظتيلي بوست للمفاجأة بتاعتي، حبيبي معقول ممكن شئ زى دا يشغل تفكيرك ثانية يعنى؟ أكيد مش ممكن وواضح جدا للجميع مين اللى محتاج يتعالج يعنى واضحة أهي»، وقالت أنغام: «ربنا يخلصنا من الأشكال دي ناس بتكره نفسها وبتكره الحياة».

وقالت الفنانة إيمان العاصي: «أقل من أنك تعملها بوست (دا أنا بنتي العيلة الصغيرة مش سايبنها في حالها)».

الفنانة أنغام بادرت بالدعاء على المتنمرين بنجوم الفن، قائلة: “ربنا يخلصنا من الأشكال دي ناس بتكره نفسها وبتكره الحياة”.

ووجه رامي جمال الشكر لكل نجوم الفن الذين دعموه وعلق على ردودهم، قائلا: “أولا أشكركم جميعا على الكلام المحترم والاهتمام أنا بس حبيت أشارككم الصدمة إن فيه قلوب صعبة كده مخافتش من تأثير الكلام اللي زي الرصاص ده، أنا متخافوش عليّ من أول مرة صارحتكم وشفت دعمكم وأنا خلاص ارتحت من الخوف من تقبلكم ليا ولفكرة التعب لكن كان لازم أوريكم ونحارب كلنا النوع القاسي ده اللي كلامه ده ممكن يحبط حد لو ضعيف إنما أنا قوي بربنا وبيكم بجد شكرا”.

وكان «جمال» أعلن إصابته بالبهاق في نوفمبر الماضي، بعد محاولات متكررة لإخفاء وعلاج البقع البيضاء، التي تتزايد معدلاتها في الجسم كلما زادت الضغوطات والمُضايقات النفسية، وقال الفنان لأول مرة عن المرض: «الحمد لله الذي أحبنى فابتلانى وأقدرنى على الصبر، من فترة ظهرت بقع بيضا في جسمى وبالكشف عرفت إنه مرض البهاق، وجربت أنواع علاج كتير ودكاترة كتير ومفيش فايدة».

وأضاف حينذاك: «أنا بقالى سنة فعلا لو عندى حفلة أو تصوير بتعب على ما أشوف طريقة أخفيه بيها، لدرجة خلت ناس تقولى شوف بيزنس تانى اعمله عشان الناس مش هتقبلك كدة، وفكرت في كلامهم بصراحة».

وتابع: «لقيت إن عندى حلين يا فعلا شكرا لحد كدة على الشغلانة دى رغم حبى ليها وعدم معرفتى بغيرها، يا إما مش هداريه تانى وتقبلونى بيه وترحموا كل اللى ربنا ابتلاهم بيه من نظرة أن شكله غريب، والحمد لله على نعمة الأهل لإنهم الوحيدين اللى بيقبلوا الواحد زى ما هو».

الوسم

               

أترك تعليق
تابعنا على تويتر