مي عمر لـ«أسرار النجوم»: خوفت من دور «ليل» في «الفتوة» وجوزي استغرب لما شافني

+ = -

استضافت إنجي علي في حلقة اليوم من «أسرار النجوم» على «نجوم إف.إم» الفنانة مي عمر، للحديث عن مشوارها واعمالها الفنية وخاصة أخرها مسلسل «الفتوة» مع الفنان ياسر جلال.

الفتوة

وتحدثت مي عمر عن دورها في مسلسل «الفتوة» قائلة: «دور ليل من أكتر الأدوار اللي حبيتها من اللي عملته، كان نفسي أعمل حاجة من عصر تاني، فلما جالي الدور ده من عصر ما عشتوش قبل كده، وأعيش حياة عمري ما عيشتها ولبس عمري ما لبسته وأدخل بيوت عمري ما دخلتها»، مضيفة «ذاكرت الشخصية كتير، لكن أول يوم تصوير بعد ما لبست اللبس والمكياج ودخلت الديكور، حسيت ساعتها إني بنتمي للعالم ده مش العالم الحقيقي».

وعن شعورها تجاه الدور أكدت مي عمر: «خفت منه لكن كنت حاباه ومتحمسة له وبعد أسبوعين بدأت اتطمن أكتر، وحبيت العصر ده لدرجة زعلت لما خلصنا تصوير».

الفنانة #مي_عمر ضيفتنا النهاردة في برنامج #أسرار_النجوم مع إنجي علي

Posted by NogoumFM 100.6 on Thursday, July 2, 2020

حسين المنباوي

وعن عملها مع المخرج حسين المنباوي مخرج مسلسل «الفتوة» قالت: «مبسوطة بالعمل معاه وكانت عندي ثقة فيه وهو قاعد ورا الكاميرا، وأكتر حاجة بتميزه أنه عينه حلوة أوي، ولو وقفتي عند أي لقطة في المسلسل هتحسي إنها لوحة».

ياسر جلال

كما تطرقت للعمل مع الفنان ياسر جلال بطل العمل، موضحة: «كنت أول مرة أشتغل معاه لكن مع أول مشهد تصوير بيننا حصلت الكيميا، وهو فعلًا ممثل متمكن ومريح وطيب أوي وبيحب الخير لكل الناس، واستمتعت جدًا بالعمل معاه».

كما عبرت عن تجربتها الرائعة بالعمل مع فنانين كبيرين هما أحمد خليل ورياض الخولي، حيث قالت: «كل ما النجم بيبقى كبير كل ما يكون التزامه وتفانيه في شغله أكتر، وهم مش واخدين التمثيل شغلانة لكنهم فنانين بجد بيحبوا المشهد اللي داخلينه»، مؤكدة أنها تشعر بالطمأنينة لا الخوف عن العمل أمام ممثل كبير، لأنه كلما كان الممثل الذي أمامك قوي كان المشهد أقوى.

وأضافت مي عمر أن أصعب مشاهد مسلسل «الفتوة» بالنسبة لها هي مشاهد الانتقام وتحول شخصية ليل في الشكل والأداء في آخر حلقات العمل، وهذا تطلب منها انفعال كبير في المشاهد.

وعن زوجها المخرج محمد سامي، قالت: «أول واحد شجعني إني أعمل المسلسل، وقال لي إن الكتابة حلوة أوي والعناصر فيه مكتملة، واتبسط لما اتفرج، واستغرب لما شافني وبالذات في الحلقات الأخيرة وإنه أول مرة يشوف الجانب ده عندي».

عادل إمام

وأوضحت مي عمر: «نفسي أمثل مع الأستاذ عادل إمام من أول ما بدأت تمثيل، فلما جالي عفاريت عدلي علام، كان حظي إن أول يوم تصوير أول مشهد معاه، فكنت متوترة جدًا وبلبس بسرعة وبزعق، لقيت حد بيخبط فزعقت، فخبط تاني وروحت فتحت لقيت أستاذ عادل، فقال لي مبروك أول يوم وإن شاء الله تعملي شغلي حلو».

محمد سامي

وأبدى المخرج محمد سامي رأيه في مي عمر الممثلة، في مداخلة ههاتفية مع البرنامج، حيث قال: «كانت عاملة مسرحية سجن النسا في مسرح الجامعة الأمريكية، وكان تحضيرها للعمل إنها بتصدق إنها الشخصية اللي بتعملها، وعلشان كده بتحب البساطة في الأداء لما بشوفها وهي بتمثل معايا بستغرب لأني بشوفها في البيت حاجة تانية، وفي ليل عجبتني في العشر حلقات الأخيرة، شوفت منها انفعالات ما شوفتهاش في حياتي منها طوال 10 سنين نعرف بعض فيها».

واختص محمد سامي «أسرار النجوم» بخبر حصري وهو أن زوجته الفنانة مي عمر ستكون بطلة مسلسله المقبل مع الفنان أحمد السقا وأمير كرارة «نسل الأغراب»، وقال: «وأنا بكتب معالجة المسلسل، وبتكلم مع الأستاذ حسام شوقي، فقلت لها أنا كاتب دور في المسلسل وكده فقالت لي السنة الجاية أنا مش معاك، فقلت لها مش هستحمل تكوني مش معايا سنتين ورا بعض»، مشيرًا إلى أنه يشعر بالغيرة عندما يرى نجاح زوجته مي عمر مع مخرج آخر خصوصًا أنهما بدءا المجال الفني سويًا وكانت لديهما أحلامهما.

أحمد السقا

وفي مداخلة له، قال الفنان أحمد السقا، الذي عملت معه مي عمر في مسلسل ولد الغلابة»: «اللي بيميز مي عمر البساطة اللي بتوصل للناس وأعتقد إن أحنا عملنا شغل حلو أوي مع بعض وكنا كابل لذيذ على الشاشة وكان معانا مخرج واعي وشاطر جدًا وانبسطت في الشغل معاه ومع مي ومجموعة العمل كلها، رغم الظروف الصعبة وكنا بنشتغل في قرى مش عالخريطة»، متمنيًا التوفيق في عملهم المقبل في «نسل الأغراب».

الوسم


أترك تعليق
تابعنا على تويتر